Commodity A2Z.17

கமாடிட்டி A-Z தொடர
  கமாடிட்டி வியாபாரம் 17

தி.ரா.அருள்ராஜன் 

தலைவர், எக்ட்ரா பங்குச் சந்தை பயிற்சி நிறுவனம்.

 
சென்ற வாரம் அப் ஸ்விங், டவுன் சுவிங், ஸ்விங் ஹய் மற்றும் ஸ்விங் லோ போன்றவற்றை பார்த்தோம் அல்லவா!

 
இந்த வாரம் நாம் ஸ்டாப் லாஸ் பற்றியும் பார்க்கபோகிறோம்.

 
ஸ்டாப் லாஸ் என்றால் என்ன?

 
நாம் பொருட்சந்தையில் ஈடுபடும்போது, அது ஒரு வியாபாரம் என்று சொல்லி இருந்தேன்.  வியாபாரத்தில் ஈடுபடும்போது, அந்த வியாபாரம் லாபத்தில் முடியலாம் அல்லது நஷ்டத்தில் முடியலாம்.

 

எடுத்துக்காட்டாக, நாம் தங்கத்தின் விலை ஏறும் என்று, 10 கிராம் தங்கத்தை ரூ.26000 வாங்குவதாக வைத்துக்கொள்வோம். இனி தங்கத்தின் விலை ரூ.26000க்கு மேல் 26100, 26200 என்று ஏற ஆரம்பித்தால் லாபம்.  அதற்க்கு மாறாக விலையானது, ரூ.25900/-, 25800/- என்று இறங்க ஆரம்பித்தால் அது நஷ்டம் என்று நமக்கு தெரியும்.

 

லாபம் என்று வரும்போது நமக்கு சந்தோஷமும், நஷ்டம் என்று வரும்போது, அது நமக்கு வருத்தத்தையும் கொடுக்கும்.  ஏறும்போது வரக்கூடிய சந்தோஷத்தை ஒருபுறம் வைப்போம்.  இறங்கும்போது வரும் வருத்தம் நமக்குள் நிகழ்த்தும் உணர்வுபூர்வமான நடவடிக்கைகள் என்ன என்று பார்க்கலாம்.

 

தங்கத்தை ரூ.26000/- என்ற விலைக்கு வாங்கியபிறகு, விலை இறங்க ஆரம்பிக்கும்போது,  நமக்குள் ஒரு ஒவ்வாத உணர்வு வருகிறது. தங்கத்தின் விலை நாம் வாங்கி ரூ.26000/-ல் இருந்து ரூ.25900/- என்று வரும்போது நமக்குள் தோன்றுவது, என்ன பண்ணலாம்.

 

ஆனால், என்ன பண்ணுவது என்று தோன்றவில்லை, அப்படியே வேடிக்கை பார்க்கிறோம்.

பின்னர் விலை இன்னும் குறைந்து ரூ 25800/- என்று வருகிறது.  இது நமக்கு மேலும் அதிக வலியை சேர்கிறது.

ஆனால், என்ன பண்ணுவது, தெரியலிங்க? ஏறனும் அப்படின்னு விரும்பறோம்.  அல்லது எதிர்பாரக்கிறோம்.

இப்படி ஒரு எதிர்பார்ப்போடு காத்திருக்கும்போது, விலை இன்னும் சிரிந்து ரூ.25600/- என்ற விலைக்கு வருகிறது.  

 

இப்போது, நமக்குள் என்ன நடக்கிறது.

 

பயம்.... பயம் வர ஆரம்பிக்கிறது.

 

இந்த பயம்தான், இதுவரை நாற்காலியில் சாய்ந்து உட்கார்ந்து கொண்டு வியாபாரம் பண்ணிய நம்மை, நாற்காலியின் நுணிக்கு இழுக்கிறது.   என்ன பண்ணலாம்?

 

நஷ்டத்தில் வித்திடலாமா?

 

நாம் வாங்கி இருக்கிறது ஒரு மெகா (1000 கிராம்).  இப்ப வித்தா? பத்து கிராமுக்கு ரூ.400/- நட்டம், அப்படின்ன ஒரு கிலோவுக்கு, இந்த நட்டத்தை 100ல் பெருக்க வேண்டும்.  அப்படி என்றால், ரூ.40000/- நட்டம்.

 

ஐயோ சாமி, காலையிலதான், ஒரு ரூ.1,50,000/-டெபாசிட் பண்ணி டிரேடிங்க ஆரம்பித்தேன்.  அதுக்குள்ள ரூ.40000/- நஷ்டமா?

 

மனதிற்க்குள் ஒரு பயத்தின் இழை வேகமாக ஆட ஆரம்பிக்கிறது.

 

இப்போது ரூ.40000/- நட்டத்தை ஏற்றுக்கொண்டு இந்த வியாபாரத்தில் இருந்து வெளியே வருவதா அல்லது பொருத்து இருக்கலாமா?  அல்லது இன்னும் கொஞ்சம் வாங்கி ஆவரெஜ் பண்ணலாமா?

 

இன்னும் ஒரு லாட்டை ரூ.25600/- என்ற விலைக்கு ஆவரெஜ் பண்ணா, மீண்டும் விலை ஏறும் போது, ரூ.25800/- என்ற விலை நமக்கு பிரேக்ஈவனை கொடுக்கும்.  அதாவதுர நோ லாஸ், நோ பிராஃபிட் என்ற நிலைக்கு வரும். அப்படி வந்த நாம், ரூ.40000/- நட்டத்தில் இருந்து தப்பித்துக்கொள்ளலாம்.

 

இப்படி நினைக்கும்போது, நமக்கு சற்றே ஆறுதலாக இருக்கிது.  எப்படியாவது இந்த ரூ.40000/- நட்டத்தில் இருந்து விடுபடவேண்டும்.  அது ஒன்றே நமக்கு நோக்கமாக இருக்கிறது. எனவே புரோக்கருக்கு ஒரு போனை போடுவோம்.  இன்னும் ஒரு லாட்டை வாங்குவோம்.  முடிவும் பண்ணியாச்சி, புரோக்கருகும் போனை போட்டாச்சி.....

 

ஆங், சொல்லுங்க சார், நான்தான் டீலர் பேசறேன்.

 

என்னது இன்னொரு மெகா வாங்கனுமா?

 

ஏற்கெனவே வாங்கன லாட்டுக்கு ரூ.40000/- எம்.டி.எம். லாஸ் போகுது, சார். அதை கட்டினாதான் இருக்கிற பொஷிஷனையே வச்சிக்கமுடியும்.  இன்னும் ஒரு லாட்டை எடுக்கனும்னா, இன்னும் ரூ.150000/- பணம் கட்டனும் சார்.

 

போன் ஸ்பீக்கரை கைய வைச்சி மறைச்சிக்கனு, யோசிக்கிறோம்.

 

இன்னும் ஒன்னரை லட்சமா?  இப்ப கட்டின பணமே என்னோட ஒரு வருஷ சேமிப்பு, இன்னும் ஒரு ஒன்னரை லட்சம் வேணும்மா, இன்னும் ஒரு வருஷம் உழைச்சாதான் முடியும்.

அப்படினா, இன்னும் ஒரு லாட் வாங்கறத வுட்ற வேண்டியதுதான்.

போன் ஸ்பீக்கரில் இருந்து கையை எடுத்துட்டு பேசறோம்.

புரோக்கர் சார், இன்னும் ஒரு லாட் நாங்க வாங்கலா சார்.  இருக்கிற ஒரு லாட்டு மட்டும் போதும்.  அதுமட்டும் அப்படியே இருக்கட்டும்.

 

டீலர் ஒரு படி மேலே போறார்.  சார், அந்த ஒரு லாட்டை நீங்க வைச்சிருக்கனும்னு நினைச்சாகூட எம்.டி.எம். ரூ.40000/- கட்டனும் சார். இல்லன்னா.... எங்க ஹெட் ஆபிசில இந்த பொஷிஷனை குளோஸ் பண்ணிடுவாங்களே?

நமக்கு மனசு கிடந்து அடிச்சிக்குது.

 

இன்னும் ரூ.40000/- கட்டனுமா? பணத்துக்கு எங்கே போவது. பணமும் கையில கிடையாது.  பணம் கையில இல்லனும் சொன்ன பொஷிஷனை இப்பவே குளோஸ் பண்ணிடுவாங்க.  சரி சமாளிக்கலாம்.

ஓகே சார், நான் ரூ.40000/- செக்கை நாளைக்கு காலையில கொடுத்திடறேன்.  அந்த பொஷிஷனை அப்படியே வைச்சுடுங்க.

 

டீலர்:  சரி சார், நான் ஹெட் ஆபிசல சொல்லிடறேன்.  கண்டிப்பா நாளைக்கு காலையில செக்கை கொடுத்திடனும்.

 

நம்ம மனசாட்சி கேட்குது, ஆமா, நாளைக்கு எப்படி செக் கொடுப்பே? அக்கவுன்ட்லதான் பணமே இல்லையே?

நீங்க சொல்லிறிங்க, அட பணம் இருந்தா மட்டும் கொடுத்துறபோறனா?  எப்டியாவது, நாளைக்கு தங்கம் இவ்ளோ வெலை இறங்கினதுக்கு நாளைக்கு கொஞ்சம் எப்படியும் ஏறித்தான் ஆவனும்.  அப்ப பாத்துக்காலம்.  நாளைக்கு வெலை ஏறிச்சினா, எம்.டி.எம். லாஸ் குறையலாம் அல்லது லாஸ் இல்லாமக்கூட போகலாம்.

எப்படியாவது, இன்னைக்கு சமாளிச்சா போதும்.

 

சரி சார்.  நாளைக்கு காலையில கட்டாயமா நான் செக் கொடுத்திர்றேன்.

டொக் போனை வைச்சாச்சி.

இன்னைக்கு பொழுதை ஓட்டியாச்சி. 

ராத்திரி தூக்கமே வரமாட்டேங்குது.  மனசு எல்லா கடவுளையும் வேண்டுது.  கடவுளே கடவுளே எப்படியாவது தங்கம் விலையை மேல ஏத்திடு.  இப்படி யோசிச்சி யோசிச்சே எப்படியோ தூங்கிவிடுகிறோம்.

ஆனால்...

ஆனால்...

மறுநாள் காலை விடியல் நமக்கு சாதகமா இல்லை.

மறுநாள் காலை தங்கம் ஒரு கேப்டவனுடன் துவங்குகிறது.  தங்கம் நேற்று ரூ.25600/- முடிந்து இருந்தது. இன்னக்கி காலைலை ரூ200/- குறைந்து ரூ.25400/-ல் துவங்குகிறது.

 

விலையை பார்த்தவுடன் நமக்கு பகீர் என்கிறது.  ரூ.200/- குறைவாக தொடங்கினால் என்ன அர்த்தம். நமக்கு இன்னும், ரூ.20000/- நட்டம் கூடி உள்ளது.  ஆக மொத்தம் இப்போது எம்.டி.எம். அளவு ரூ.60000/- என்ற அளவில் உள்ளது.

 

நமக்குள் பயம் தீயாக மாறுகிறது.  நம் உடலை சுற்றி, ஒரு இன்ச் அளவிற்க்கு  ஒரு உஷ்ண அளவு வெளிப்படுகிறது.  நெற்றியில் சூடு ஏற ஆரம்பிக்கிறது.  கால், கை முட்டிகளில் வலி விண் விண் என்று தெரிக்க ஆரம்பிக்கிறது.

 

மூளை எப்போதோ குழப்பி செயலற்ற நிலைக்கு சென்றுவிட்டது.

உடல் முழுவதும் வலி, மனம் முழுவதும் குழப்பம். 

என்ன செய்வது? என்ன செய்வது?

 

புரோக்கர் ஆபிசில் இருந்து போன், சார், இப்ப எம்.டி.எம் ரூ.60000/- இப்ப கட்டீரிங்களா அல்லது பொஷிஷனை குளோஸ் பண்ணலிட்லாமா?

 

நமக்கு கையும் ஓடல, காலும் ஓடல.  ஆனா வாய் மட்டும் தொடர்ந்து முணு முணுக்கிறது.  

சார்... சார்... குளோஸ் பண்ணிடாதீங்க சார்.  ஒரு மணிநேரம் பார்கலாம் சார்.  இப்ப குளோஸ் பண்ணா, எனக்கு ரூ.60000/- நட்டம் வரும் சார்.  கொஞ்சம்  பொருங்க.  தங்கம் ஒரு ரூ.200/- மேல வந்தாக்கூட போதும், அப்ப ஒரு ரூ.20000/- நட்டத்தையாவது குறைக்கலாம்.

 

நம்முடை கெஞ்சல், புரோக்கரின் மனதை கொஞ்சம் கரைத்தது.

சரி சார், கரெக்டா நாம் ஒரு மணிநேரம் பொருத்திருப்பேன்.  அப்பிடி ஒரு மணிநேரத்தில் உங்களுக்கு சாதகமா ஏறலனா, நான் கட்டிப்பா வித்துடுவேன்.  புரோக்கரின் எச்சரிக்கை காதில் ஒலித்துக்கொண்டு இருக்கிறது.

நாம் விலையை டி.வி.யில பார்க்கிறோம்.  நெட்ல பார்கிறோம். தங்கத்தின் விலை ஏறினபாடுதான் இல்லை.  பார்த்துக்கொண்டே இருக்கும்போது, விலை மேலும் மள மளவென்று சரிய ஆரம்பிக்கிறது.  புரோக்கர் சொன்ன ஒரு மணிநேரமும் முடிவுக்கு வருகிறது.  அதற்க்குள் தங்கம் மேலும் ரூ.200/- விலை சரிந்தது.  தங்கம் 10 கிராம் விலை ரூ.25200 ஐ தொட்டது.  நஷ்டம் ரூ.80000 ஐத்தொட்டது.

 

புரோக்கர் கொடுத்த ஒரு மணிநேரமும் முடிந்தது.

 

புரோக்கரிடம் இருந்து போன் கால் வருகிறது.  உங்கள் பொஷிஷன் ரூ.80000 நஷ்டத்தில் குளோஸ் பண்ணப்பட்டதாக அறிவிக்கப்படுகிறது.  நமக்கு காலின் கீழ் இருந்த நிலம் நழுவி விழுவதுபோல் உள்ளது.

ஒரு வருடத்தின் சேமிப்பில் பாதி இரண்டு நாள்ல போயிடிச்சி.

 

தலையெல்லாம் ஒரே வலி.  சரி நல்லதா ஒரு காபி குடிச்சா தேவலை என்பது போல் இருந்தது.   எனவே வெளியே போய் ஒரு காபி குடிச்சிட்டு, மனசே கொஞ்சம் தேத்தலாம் என்று வெளியே வருகிறோம்.

மனசு அசை போடுகிறது.

 

நாம் ஏன் தங்கத்தை ரூ.26000/- என்ற விலைக்கு வாங்கினோம். ஏறும் என்று வாங்கினோம்.  அப்புறம் ஏறிச்சா?  இல்லையே.  மாறாக இறங்க ஆரம்பிச்சது.  இந்த நிலையில, நமக்கு என்ன நடக்குது.  நட்டம் வருது.  இப்படி நட்டம் வரும்போது, நாம, இப்ப விட்டமாதிரி ரூ.80000/- ஒரே சமயத்தில் லம்பா விடமா ஏன் தடுத்து இருக்கக்கூடாது.  

நாம் வாங்கின விலை ரூ.26000/-.  இதில இருந்து ரூ.100/- குறைச்சி ரூ.25900/- என்ற விலைக்கு வரும்போது, நமக்கு எவ்ளோ நஷ்டம்?

 

ஓகே... 100 X 100 = ரூ.10000 நஷ்டம்.  

அப்பவாது நிறுத்தி இருக்கலாம்.  அப்புறம் ரூ.200/- என்ற அளவுக்கு இறங்கியது.

அப்ப எவ்வளவு நஷ்டம்?

ஓகே... 200 X 100 =  ரூ.20000/- நஷ்டம்.  இங்கேயாவது நட்டத்தை தடுத்து இருக்கலாம்.

இவ்வாறு, நாம் வாங்கியபிறகு, நாம் எதிர்பார்ததிற்க்கு மாறாக இறங்கும்போது, நமக்கு வரக்கூடிய நஷ்டத்தை நிறுத்த, நாம் நிர்ணயம் செய்யும் விலையின் அளவுதான் நஷ்டத்தடை என்கிறோம்.  அதை ஆங்கிலத்தில் ஸ்டாப்லாஸ் என்கிறோம்.

அப்படி என்றால், நாம் வியாபாரத்தில் ஏறும் என்று வாங்கும்போது, மாறங்கினால், வரக்கூடிய நஷ்டத்தை தடுத்தநிறுத்த நாம் முடிவு செய்யும் விலையின் அளவைவே ஸ்டாப்லாஸ் என்கிறோம்.

இப்போது நமக்கு ஸ்டாப்லாஸ் என்றால் என்னவென்று தெரியும்.  அதை போடாவிட்டால் எந்த அளவிற்க்கு பாதிப்பு வரும் என்றும் தெரியும் அல்லவா?

இந்த ஸ்டாப் லாசை பற்றிய இன்னும் பல அறிய விவரங்களை நாம் வரும் வாரம் பார்க்கபோகிறோம்.  மேலும் கேப் டவுனை எப்படி சமாளிக்கலாம் என்றும் படிக்க போகிறோம்.

Source:

http://www.vikatan.com/personalfinance/article.php?module=nanayam&aid=8780

Read more...

CommodityA2Z- 18

கமாடிட்டி A-Z தொடர் 18

தி.ரா.அருள்ராஜன்

தலைவர், எக்ட்ரா பங்குச் சந்தை பயிற்சி நிறுவனம்.

சென்ற வாரம் ஸ்டாப் லாசை பற்றி விரிவாக பார்த்தோம்.  ஸ்டாப் லாஸ் போடாமல், வியாபாரம் செய்யும்போது நமக்கு வரக்கூடிய நஷ்டமே, நம் முதலின் கணிசமான பகுதியை காலி பண்ணிவிடுகிறது என்பதையும் பார்த்தோம்.  அவ்வாறு ஸ்டாப் லாஸ்போடாதபோது ஒரு கேப் டவுன் நிகழ்ந்தால் அது நம் நட்டத்தை உடனடியாகவே பெரிய அளவில் உயர்த்திவிடுகிறது என்றும் பார்த்தோம்.

அது எப்படி?

சென்ற வார எடுத்துக்காட்டில், நாம் தங்கத்தை ரூ.26000/- என்ற விலைக்கு வாங்குவதாக பார்த்தோம்.  பின் விலை படிப்படியாக இறங்கி ரூ.25600/-வரை இறங்கி நாள் முடிவில் நமக்கு ரூ.400/- நஷ்டத்தில் கொண்டு வந்துவிட்டது என்றும் பார்த்தோம்.  ஆனால், நஷ்டத்தில் நாம் வெளிவர மனசில்லை.  எனவே அடுத்த நாள் காலைவரை காத்திருக்கலாம் என்ற முடிவுக்கு வருகிறோம்.

அடுத்த நாள் விலை ரூ.200/- இறங்கி ரூ.25400/- என்ற விலையில் வியாபாரம் ஆரம்பிக்கிறது.
இதைத்தான் கேப் டவுன் என்று குறிப்பிடுகிறோம்.

இப்படி கேப்டவுனில் விலை ஆரம்பிக்கும்போது, நாம் ஏற்கெனவே ரூ.400/- என்ற நட்டதில் இருந்து ரூ.600/- என்ற நட்டத்திற்க்கு உயர்த்துகிறது.  இந்த நட்டம் என்பது ஒருவேளை நாம் ஒரு மெகா வாங்கி இருந்தால் (ஒரு கிலோ தங்கம்) ரூ.60000/-மாக இருக்கும்.

நேத்துதான் ஒரு லாட் எடுத்தேன், இன்னக்கி காலைல ரூ.60000/- நஷ்டம் என்று நினைக்கும்போது,  மனத்திற்குள் ஏதோ பிசைகிறது.   கண்ணில் ஒரு மயக்கம் தெரிகிறது.  மூளை வேலைசெய்வது குறைகிறது. 
என்ன செய்வது?  என்ன செய்வது? 
குழப்பம்.

இந்த நிலையில், ரூ.200/- என்ற அளவில் இறங்கி கேப்டவுனில் துவங்கிய தங்கம், ரூ.25400 என்ற விலையில் இருந்து படிப்படியாக இறங்க ஆரம்பிக்கிறது.

அடுத்து விலை ரூ.25300/- தொடுகிறது.
இப்போது நட்டம் ரூ.70000/-

தலை லேசாக சுற்றுகிறது.  என்ன செய்வது என்றே தெரியவில்லை.
மீண்டும் விலை இறங்க ஆரம்பிக்கிறது. இன்னும் ஒரு ரூ.100/- குறைந்து, தங்கம் ரூ.25200/- தொடுகிறது.
இப்போது நட்டம் ரூ.80000/-மாக மாறுகிறது.

மனது முழுவதும் பாரம்.   தாங்கமுடியவில்லை.  அப்பா... சாமி... முடியல....
புரோக்கரை கூப்பிட்டு, சார் வித்திருங்க, வித்திருங்க சார். என்கிறோம்.
புரோக்கர்: சார் என்ன விலைக்கு விக்கட்டும்.
நாம்:  என்ன வெலையா இருந்தாலும் வித்துடுங்க சார்.  எங்கிட்ட எதுவும் கேட்காதீங்க சார்.
புரோக்கர் வித்தாச்சி சார்.
நஷ்டம் ரூ.80000/-

முதல் நாள் ரூ.40000/- நஷ்டத்தில் இருந்த மெகா பொஷிஷன், இப்போது கேப்டவுன் மூலம் நமக்கு ரூ.80000/- நட்டமாக மாற்றிவிட்டது.

ஒரே நாளில் இவ்வளவு பெரிய நஷ்டத்தை வாழ்க்கையில் சந்தித்தது இல்லை.  பல மாதங்களின் சேமிப்பை இப்படி ஒரு நாளில் அழித்தது இல்லை.
தங்கமே ஆனாலும், வியாபாரம் என்று வரும்போது நஷ்டம் வருவதற்கு வாய்ப்பு உள்ளது என்பது இப்போதுதான் புரிந்தது.
ஆனால், ஒரே நாளில் எப்படி இவ்வளவு நட்டம்?
ரூ.80000/- நஷ்டம் என்பது, ஒரு வினாடியிலோ அல்லது ஒரு நிமிடத்திலோ வரவில்லை.  ஒரு நாள் முழுவதும் காத்திருந்தபோதுதான், அது படிப்படியாக அதிகரிக்க ஆரம்பித்தது. முதலில் இந்த நஷ்டம் சில ஆயிரங்களில் ஆரம்பித்து பின்பு ரூ.5000/- மற்றும் ரூ.10000/- என்று அதிகரித்து பின்பு ரூ.40000/- என்ற எல்லையை அடைந்தது.
நாம் நினைத்திருந்தால், நட்டத்தை ரூ.5000/-திலோ அல்லது ரூ.10000/-திலோ தடுத்து நிறுத்தி இருக்கமுடியும். 
ஆனால், நாம்தான் தடுத்து நிறுத்தவில்லை.  ஏனெனில், நாம், நட்டம் என்பதையே ஏற்றுக்கொள்ள தயாராகவில்லை.  இறங்கிய விலை மீண்டும் ஏறிவிடும் என்று நாம் நம்பிக்கையுடன் காத்திருந்தோம். அதுவும் நடக்கவில்லை.
அது போகட்டுங்க....
அடுத்த நாள் கேப்டவுன் ஆனாதால்தான் எனக்கு கூடுதலாக ரூ.40000/- நட்டம்.  அதுமட்டும் நடக்காமல் இருந்தால் எனக்கு இவ்ளோ நட்டம் வந்துருக்காதுங்க.

சரி, இனி கேப்டவுன் அப்படின்னா என்ன? அதை எப்படி சமாளிக்காலம் என்று பார்ப்போம்.
கேப்டவுன் என்பது நேற்றைய முடிவு விலையில் இருந்து, இன்றைய காலை வியாபாரத்தின் முதல் வியாபாரமானது கணிசமான அளவு இறங்கி வியாபாரமாக துவங்கினால் கேப்டவுன் என்று சொல்கிறோம்.

நேற்றைய முடிவு விலை: ரூ.25600/- 
                                       
            கேப்டவுன் ஓபன்

இன்றைய ஆரம்பவிலை: ரூ.25400/-

பொதுவாக கேப்டவுன் என்பது விலையில் நிகழும் வலிமை குன்றுதலை காட்டுகிறது.  இந்த வலிமை குன்றுதல் பொதுவாக தொடர வாய்ப்புள்ளது.  அவ்வாறு தொடர்ந்தால், விலையானது, தொடர்ந்து இறங்க ஆரம்பிக்காலம்.
இந்த வலிமைகுன்றுதலுக்கு பிறகு என்ன நடக்கலாம் என்று விரிவாக பார்ப்போம்.

நேற்றைய முடிவு விலை:

இன்றைய ஆரம்பவிலை:

முதல் ஒருமணிநேர கேன்டில்

விலையானது இன்று காலை கேப்டவுனில் துவங்கிய பிறகு நாம் ஒரு மணிநேரம் காத்திருக்கவேண்டும். (சில நேரங்களில் இது அரைமணி நேரம்கூட போதுமானதாக இருக்கும்.) 

இந்த காத்திருப்பால் என்ன நிழலாம்?

கேப்டவுனில் துவங்கிய விலையின் இறக்கம், ஒரு முடிவுக்கு வரலாம்.  அதாவது, கேப்டவுனில் விலை துவங்கியவுடன், இது பலபேரை மேலும் விற்பதற்க்கு தூண்டலாம்.  இவ்வாறு தூண்டபடுவதால், அவர்கள் விற்பனை, விலையை இன்னும் இறங்குவதற்க்கு காரணமாக அமையலாம். எனவே கேப்டவுன் நிகழ்வால், விற்கவேண்டும் என்று நினைப்பவர்கள் விற்பனை முதல் அரைமணி நேரத்திலோ அல்லது ஒரு மணிநேரத்திலோ முடிவுக்கு வரலாம்.

இந்த உடனடி விற்பனைகள் என்பது முடிவுக்கு வந்த பிறகு, சந்தை நிலை பெற துவங்கலாம்.  அதாவது, கேப்டவுனின் மூலம் நிகழ்ந்த நீஜெர்க் ரியாக்க்ஷன் முடிவுக்கு வந்ததாக எடுத்துக்கொள்ளலாம்.  அதன் பிறகு சந்தை, இப்போது இறங்கிய இறக்கம் தேவையான இறக்கமா அல்லது தேவைக்கு அதிகமாக இறங்கிவிட்டதா என்று முடிவு செய்யும்.

அது என்ன சந்தை முடிவு செய்யும்?  யார் இந்த சந்தை?

அட... அது நீங்களும் நானும்தாங்க.  சந்தையில் பங்கெடுப்பவர்கள் முடிவு செய்வது.  இந்தையில் பங்கெடுப்பவர்கள் லட்சக்கணக்கான மக்கள்.  இதில் தனிநபரும், நிறுவனங்களும் அடங்கும்.  ஒவ்வொருவருக்கும் சந்தைசார்ந்த கருத்துக்கள் இருக்கும்.  அதாவது,
1.இந்த விலை நியாயமான விலை,
2.இந்த விலை தேவைக்கு அதிகமாக ஏறிவிட்டது,
3.இந்த விலை தேவைக்கு அதிமாக இறங்கிவிட்டது.

இந்த மூன்று கருத்துக்கள்தான் சந்தையில் பங்கெடுப்பவர்களின் மனதில் ஓடிக்கொண்டு இருக்கும்.  இந்த கருத்துக்கள் அடிப்படையில்தான்,  இந்த கருத்தை உடையவர்களின் செயல்பாடுகள் என்னவாக இருக்கலாம்?
1.தற்போதைய விலை நியாயமான விலை என்று நினைப்பவர்கள் அதிகமா இருந்தால், சந்தையில் விலை பெரிய ஏற்ற, இறக்கங்கள் இல்லாமல், ஒரு பக்கவாட்டு நகர்வில் இருக்கும்.
2.தற்போதைய விலை தேவைக்கு அதிகமாக ஏறிவிட்டது என்று நினைப்பவர்கள் அதிகமாக இருந்தால், அவர்கள் விற்பவர்களாக மாறி விலையானது இறங்க ஆரம்பிக்கும்.
3.தற்போதைய விலையானது, தேவைக்கு அதிகமாக இறங்கிவிட்டது என்று நினைப்பவர்கள் அதிகமாக இருந்தால், அவர்கள் வாங்குபவர்களாக மாறிவிடுவார்கள்.   இதனால், விலையானது ஏற ஆரம்பிக்கும்.

பொதுவாக சந்தையின் செயல்பாடுகள் என்பது, பெருபான்மையானவர்கள் எவ்வாறு செயல்படுகிறார்களோ அந்த திசையில் நகரும்.  அதாவது, பெரும்பான்யானவர்கள் வாங்குபவர்களாக இருந்தால், சந்தை ஏறுமுகமாக இருக்கும்.  பெரும்பான்மையானவர்கள் விற்பவர்களாக இருந்தால், சந்தை இறங்குமுகமாக இருக்கும்.  பெரும்பான்மையானவர்கள் சந்தையில் பங்கெடுக்கவில்லையென்றால், சந்தை பக்கவாட்டு நகர்வில் இருக்கும்.
இப்போது நம்முடைய கேப்டவுன் எடுத்துக்காட்டுக்கு வருவோம்.

தங்கம் கேப்டவுனில் இறங்கிய பிறகு, முதல் அரைமணி நேரம் அல்லது ஒரு மணி நேரம் காத்திருக்கவேண்டும் என்று கூறினேன் அல்லவா!

இந்த முதல் ஒரு மணிநேரம் என்பது பொதுவாக அவசரகுடுக்கைகள் அல்லது முந்திரிகொட்டைகள் செயல்பாடுகளுக்கான நேரமாக எடுத்துக்கொள்ளலாம். ஒரு மணிநேரத்தில்,  முடிவெடுக்கும் நபர்கள் எல்லாம், முடிவெடுத்துவிடுவார்கள் என்றும் எடுத்துக்கொள்ளலாம்.

இந்த ஒரு மணிநேரத்திற்கு பிறகு, சந்தை அறிவுபூர்வமாக யோசிக்க ஆரம்பிக்கும் கூட்டம் நிரம்பியதாக இருக்கும்.  இந்த கூட்டம் மிக வலுவான கூட்டம் ஆகும்.  இவர்களின் செயல்பாடுகள் சந்தை தொடரந்து ஒரே திசையில் பயணிக்கும்வண்ணம் இருக்கும்.

இனி, ஒரு மணிநேரத்திற்க்கு பிறகு என்ன, நடக்கலாம்.

நேற்றைய முடிவு விலையில் இருந்து கேப்டவுன் துவக்கம் என்பதே, விலையில் கணிசமான இறக்கமாக இருக்கலாம்.  அவ்வாறு ஏற்கெனவே நன்கு விலை இறக்கிய நிலையில், முதல் ஒரு மணிநேரத்தில் உணர்வுபூர்வமாக முடிவெடுக்கும் கூட்டத்தால், விலை இன்னும் வலுவாக இறங்குகிறது.  இந்த இறக்கும், கேப்டவுன் இறக்கத்தை போன்று இன்னும் ஒரு மடங்கு இறங்கலாம். 

எனவே குறுகிய காலத்தில், விலையானது, மிகப்பெரிய அளவில் இறங்கலாம்.  இவ்வாறு இறங்கும்போது, சந்தையில் விலையானது தேவைக்கு அதிகமாக இறங்கிவிட்டதாக நினைக்கும் கூட்டம் அதிகமானால், அவர்கள் வாங்குபவர்களாக மாறிவிடுவார்கள்.  அவ்வாறு வாங்குபவர்கள் அதிகமானால், விலையான ஏற ஆரம்பிக்கும்.

நேற்றைய முடிவுவிலை
                                                 
இன்றைய ஆரம்பவிலை  

முதல் ஒருமணிநேர கேன்டில்

விலை தேவைக்கு அதிகமா இறங்கிவிட்டது என்றால்? வாங்குபவர்கள் கூட்டம் அதிகமாகி, விலையானது, இறங்கும் திசையில் இருந்து மீண்டும் மேல்நோக்கி திரும்புகிறது. பின்பு படிப்படியாக ஏற ஆரம்பிக்கிறது.  இவ்வாறு ஏறும்போது, முதலில், ஒரு மணிநேரத்தின் அதிகபட்சவிலையில் தடுக்கப்படலாம்.  அதையும் தாண்டி ஏறும்போது, விலை வலிமையாக மாற ஆரம்பித்துள்ளதாக எடுத்துக்கொள்ளலாம்.

கேப்டவுனில் துவங்கியவிலை ஒரு மணிநேரத்திற்கு பிறகு வரும் கேன்டிலின் அதிகபட்சவிலையை தாண்டி ஏற ஆரம்பிக்கும் இடம் வாங்குவதற்க்கு தகுதியான இடமாக பார்க்கலாம்.  இங்கிருந்து விலை தொடரந்து மேலே ஏறி, நேற்றைய முடிவுவிலையை நோக்கி நகரலாம். நேற்றைய முடிவுவிலை என்பது அடுத்தக்கட்ட தடைநிலையாகவும் இருக்கலாம்.  அந்த இடத்தில் கொஞ்சம் லாபத்தை வெளியே எடுக்கலாம்.  அதன் பின் முந்தையநாள் முடிவுவிலையையும் தாண்டி ஏற ஆரம்பித்தால், அதுகட்ட வலிமையான ஏற்றத்திற்க்கு தன்னை தயார்பண்ணிக்கொண்டு இருக்கிறது என்று  அர்த்தம்.

முதல்கட்டமாக ஒருமணிநேரத்தின் உச்சத்தை தாண்டியவுடன், வாங்க தவறியவர்கள், முந்தையநாள் முடிவுவிலையை தாண்டியவுடன், கிடைக்கும் இரண்டாவது வாய்ப்பை பயன்படுத்தி வாங்கலாம்.

நேற்றைய முடிவு விலை

இன்றைய ஆரம்பவிலை

ஒரு மணிநேர கேன்டில்

முந்தைய நாள் முடிவுவிலையை தாண்டி விலைஏறியுவுடன், மதில்பூனையாக இருந்தவர்களும் வாங்குபவர்களாக மாறிவிடுகின்றனர்.  எனவே சந்தையில் வாங்குபவர்கள் கூட்டம் இன்னும் அதிகமாக மாறி, விலையானது இன்னும் வலுவாக ஏற ஆரம்பிக்கிறது.

ஒரு கேப்டவுனை எப்படி சமாளிக்கலாம் என்பதை இதுவரை பார்த்தோம்.  அதற்க்கு ஒரு எடுத்துக்காட்டும் பார்ப்போம்.

மேலே உள்ள வரைபடம் கோல்ட் டிசம்பர் 2014 கான்டிராக்ட் மணிதுளி வரைபடம் ஆகும். 
இதில் 10.11.14 அன்று தங்கம் விலை இறங்கி முடிந்துள்ளது.  அடுத்த நாள் 11.11.14. அன்று விலை கேப்டவுன் மூலம் இறங்கி துவங்கி உள்ளது.  முதல் ஒருமணிநேரத்தின் கேன்டிலின் உச்சத்தை தாண்டி ஏற ஆரம்பித்தவுடன் அதை முதல் வாய்ப்பாக பார்க்கவேண்டும் என்று கூறி இருந்தேன்.  பின் தொடர்ந்து ஏறியபோது முந்தையநாள் முடிவுவிலையையும் தாண்டி ஏறிக்கொண்டிருப்பதை பார்க்கிறோம். இதை வாங்குவதற்கான இரண்டாம் வாய்ப்பாக பார்க்கவேண்டும்.

இந்த கேப்டவுனை இன்னும் எவ்வாறு செம்மையாக கையாளலாம் என்று அடுத்த வாரம் பார்க்கலாம்.

Source:

http://www.vikatan.com/personalfinance/article.php?module=nanayam&aid=8867

Read more...

Commodity A2Z-19

கமாடிட்டி வியாபாரம் 19

தி.ரா.அருள்ராஜன்

தலைவர், எக்ட்ரா பங்குச் சந்தை பயிற்சி நிறுவனம்.

இந்த கேப்டவுனை இன்னும் எவ்வாறு செம்மையாக கையாளலாம் என்று சென்ற வாரம் ஒரு பகுதியை பார்த்தோம்.

அதற்க்கு எடுத்துக்காட்டாக தங்கத்தை பார்த்தோம். இந்த கேப்டவுன் நடக்கும்போது, பெரும்பாலும் ஏறி முடிகிறது என்றும் பார்த்தோம். அவ்வாறு ஏறி முடிந்ததற்க்கு எடுத்துக்காட்டாகத்தான் தங்கத்தை பார்த்தோம். இதுபோன்ற நிகழ்வு மற்ற கமாடிட்டிகளிலும் நடக்கிறதா என்பதையும் இன்னும் சில எடுத்துக்காட்டுகளுடன் பார்க்கலாம்.

குரூட்ஆயில்:

குரூட் ஆயில் 07.11.14. முந்தையநாள் முடிவுவிலை 4814, அடுத்தநாள் கேப்டவுன் ஆரம்பவிலை 4791.

மேலே உள்ள குரூட்ஆயில் வரைபடத்தில் 07.11.14 அன்று முதல் ஒரு மணிநேரத்தின் உச்சமான 4791ஐ தாண்டி ஏறி முந்தைய நாள் முடிவுவிலையான 4824ஐ அடைந்தது. அதன் பின், முந்தையநாள் முடிவு விலையையும்தாண்டி ஏறி 4868 என்ற புள்ளிகளை தொட்டு பெரும் லாபத்தை கொடுத்தது.

நிக்கல்:

நிக்கல் 30.10.14. அன்று, ஒரு கேப்டவுனுடன் துவங்கி உள்ளது. முந்தையநாள் முடிவு விலை 958.70. அடுத்தநாள் கேப்டவுனில் துவங்கிய விலை 951. பின்பு நாள் முழுவதும் பக்கவாட்டு நகர்விலேயே இருந்தது. பின்பு இரவு 9 மணி அளவில், முதல் ஒரு மணிநேரத்தின் உச்சத்தை தாண்டி ஏறியது. பின்பு முந்தையநாள் முடிவுவிலையான 958.70ஐ தொட்டது. மீண்டும் அந்த எல்லையை தாண்டி தொடரந்து ஏறி அன்றே 967 என்ற உச்சத்தையும், அடுத்த நாள் 986 என்ற புதிய உச்சத்தையும் தொட்டு பெரும் லாபத்தை கொடுத்தது.

லெட்:

லெட் 06.11.14 அன்று ஒரு கேப்டவுனுடன் துவங்கியது. பின்பு முதல் ஒரு மணிநேரத்தின் உச்சத்தை தாண்டி மிக வலிமையாக மேல் நோக்கி ஏறி உள்ளது.

ஸிங்க்:

ஸிங்க் 30.1.14. அன்று ஒரு கேப் டவுனுடன் துவங்கியது. இந்த கேப் டவுன் ஓப்பன் ஆன பிறகு, இரண்டு மணிநேரம் கழித்து முதல் ஒரு மணி நேரத்தின் உச்சத்தை உடைத்து மேலே ஏறியது, இருந்தாலும். அடுத்த நான்கு மணிநேரம் மெல்ல மெல்ல இறங்க ஆரம்பித்தது. இந்த இறக்கம் அந்த நாளின் குறைந்தபட்ச விலையை உடைக்கவில்லை என்பதால் ஏற்றம் தொடர்வதாகவே வைத்துக்கொள்ளலாம். இந்த வழிமுறையை வைத்து வியாபாரம் செய்ய நினைப்பவர்கள், நாளின் லோவை நட்டத்தடையாக வைத்து செயல்படலாம்.

இதுவரை நாம் கேப்டவுனின் ஒரு வகையை விரிவாக பார்த்தோம். அதற்கான எடுத்துக்காட்டுகளையும் மிக விரிவாக பார்த்தோம். இனி கேப்டவுனின் அடுத்த வகையை பற்றி பார்க்கலாம்.

கேப்டவுனின் இரண்டாம் வகை:

முந்தைய நாளின் முடிவுவிலையைவிட குறைந்து துவங்கி, அதன் பின் ஒரு மணிநேரத்திற்க்கு பிறகு, உச்சத்தை தாண்டி வியாபாரம் ஆகும் முறை பற்றி இதுவரை பார்த்தோம் அல்லவா!.

இதில், அடுத்த வகை, கேப் டவுனில் துவங்கிய பிறகு, அடுத்த ஒரு மணிநேரத்தின் கேன்டில் உடைய லோவை உடைத்து இறங்கி, தொடர்ந்து அதே திசையில் பயணிக்கும் வகை ஆகும்.

இந்த வகையில், கேப் டவுன் என்றாலே வலிமை குன்றுதல் என்று ஏற்கெனவே பார்த்தோம். அந்த வலிமை குன்றுதல் என்பது, முதல் ஒரு மணிநேரத்தின் கேன்டில் உடைய லோவை உடைக்கும்போது, பெரும்பாலோர், இனி விலை தொடரந்து இறங்க வாய்ப்புள்ளது என்று நம்ப ஆரம்பிக்கிறார்கள். எனவே அவர்கள் விற்பவர்களாக மாறுகிறார்கள். இப்படி சந்தையில் பெரும்பான்மையானவர்கள் விற்பவர்களாக மாறுவதால், விலை தொடரந்து இறங்க ஆரம்பிக்கிறது. அன்று முழுவதும் விலையானது இறங்கியே பயணித்து இறங்கியே முடிகிறது. இதை விளக்கப்படத்துடன் பார்க்கலாம்.

முந்தையநாள் முடிவுநிலை 

இன்றைய ஆரம்பவிலை

இந்த விளக்கப்படத்தில் விலை நேற்றைய விலையைவிட இறங்கி துவங்கி உள்ளது. அதன் பின், விலையானது தொடர்ந்து இறங்குகிறது.

நேற்றைய விலை

இன்றைய ஆரம்பவிலை

முதல் ஒருமணிநேர கேன்டில்

இந்த விளக்கப்படத்தில், விலையானது, இறங்க ஆரம்பித்துள்ளது. நாம் முதல் ஒரு மணிநேரம் எந்த வியாபாரமும் செய்யாமல், பொருமையாக காத்திருக்கிறோம். ஒரு மணிநேரம் முடிந்த பிறகு, ஒரு மணி நேர கேன்டிலின் உச்சத்தை தடைநிலையாகவும், ஒரு மணிநேர கேன்டிலின் லோவை ஆதரவுநிலையாகவும் எடுக்கலாம் என்று ஏற்கெனவே சொல்லி இருக்கிறேன்.

இப்போது நடப்பது என்ன?

முந்தைய எடுத்துக்காட்டில், கேப் டவுன் ஆனபிறகு, மேல்நோக்கி செல்லும் வாய்ப்பு அதிகம் என்று பார்த்தோம். ஆனால், இந்த முறை, கேப் டவுன் ஆன பிறகு, ஒரு மணிநேரம் கழித்து, விலையானது, தொடர்ந்து கீழ்நோக்கி இறங்க ஆரம்பிக்கிறது. இந்த இறக்கமானது, தொடரந்து இறங்கி வலிமையான இறக்கமாக மாறுகிறது. விலையானது, அந்த நாள் முழுவதும் இறங்கி, முடிவுவிலையும் கணிசமாக இறங்கி முடிகிறது.

நேற்றைய முடிவுவிலை

இன்றைய ஆரம்பவிலை

முதல்ஒருமணிநேர கேன்டில்

இந்த கேப்டவுன் எடுத்துக்காட்டில் , இறங்கி துவங்கிய விலை, தொடரந்து இறங்கி, நாள் முழுவதும் இறங்கி, முடியும்போது, அந்த நாளின், குறைந்தபட்ச்ச விலையில் முடிகிறது.

இதுதான் இரண்டாவது வகையான, கேப்டவுன ஆகும்.

இந்த கேப் டவுன் வகைக்கு, சில எடுத்துக்காட்டை பார்ப்போம்.

கோல்ட்:

மேலே உள்ள வரைபடத்தில், தங்கம் 29.10.14.ல் ரூ.27072, என்ற விலையில் முடிந்துள்ளது. அடுத்து நாள், 30.10.14. அன்று, ரூ.26990/- என்ற விலையில் துவங்கி உள்ளது. இது ஒரு கேப் டவுன் ஓபன் ஆகும். பின் ஒரு மணிநேரம் கேன்டிலின் லோவை எடுத்தால், ரூ26852/- ஆகும். அதன் பின் தங்கம் விலை தொடர்ந்து சரிந்து கடைசியாக ரூ.26625/- என்ற விலையில் முடிந்துள்ளது. இது தங்கம் கேப் டவுன் ஆனதிற்கான எடுத்துக்காட்டு.

சில்வர்:

மேலே உள்ள சில்வர் வரைபடத்தில், 29.10.14 அன்று, ஒரு கிலோ தங்கம் ரூ.38252/-ல் முடிவற்றுள்ளது. அடுத்த நாள் 30.10.14 அன்று ரூ.38125/- என்ற விலையில் இறங்கி துவங்கி உள்ளது. இறங்கி துவங்கிய வெள்ளி, அடுத்த ஒரு மணிநேரத்தில் தொடரந்து இறங்கி ஒரு கரடிக்கான கேன்டிலை தோற்றுவிக்கிறது. அடுத்தடுத்து வருகின்ற கேன்டில்கள் தொடர்ந்து விலை இறங்குவதை காட்டுகிறது. கடைசியில் நாள் முடியும்போது, ரூ.36550/- என்ற விலையில் முடிந்துள்ளது.

இதுவரை நாம் கேப் டவுன் ஓபனிங்கில் இரண்டு வகையை பார்த்தோம். மேலும், இரண்டாவது வகையான இறங்கி துவங்கி, தொடர்ந்து இறங்கி, பின் இறங்கியே முடிவதை பார்த்தோம். அதற்க்கு சில எடுத்துக்காட்டுகளையும் பார்த்தோம்.

அடுத்த வாரம் கேப் அப் என்றால் என்ன?

கேப் அப்பை எப்படி நமக்கு சாதகமாக பயன்படுத்தலாம் என்று விரிவாக பார்க்கலாம்.

Source:
http://www.vikatan.com/personalfinance/article.php?module=nanayam&aid=9150

Read more...